October 17, 2007                                        News You Can Trust!!                                      Volume 7

KEI ‘ASI MAI PE ‘AE LOTO TANGIA, LOTO SAUNI MOE TAAUFEHI’A MEIHE PULE’ANGA

Ko hono faka’eke’eke makehe ‘oe Fakafofonga fika I ‘o Tongatapu, ‘Akilisi Pohiva.

KELE’A: ‘I ho’o mou hu atu ko ‘eni ‘ihe ta’u falealea ko ‘eni, ki’i fakamatala ange pe koe ha e tu’unga ‘oku ‘iai ‘ae Falealea, he ‘oku ‘iai ‘ae tui ‘oku ki’i makehe ange ‘ae Falealea he ta’u ni hili ange koia ‘ae ‘aho 16/11?

‘AKILISI: Kimu’a koia pea toki fakaava ‘ae falealea ‘ihe ta’u ni, na’e ‘iai ‘ae ngaahi fokotu’utu’u mai ia, tautefito kihe Nusipepa Taimi ‘o pehe tokua he ‘ikai ke fakahoko ha falealea he ta’u ni koe ‘uhi koe ngaahi maumau koia ne hoko ‘ihe ta’u kuo’osi. Kaikehe, kuo ‘ikai ke mo’oni ‘ae lau ia koia, he ko ‘eni ia kuo fakaava ‘ae falealea pea kiamata ‘ae falealea ia. Na’e toe ‘iai foki moe ongoongo ne fokotu’u mai ‘ehe Taimi ‘o pehe, ko ‘ene ‘osi pe koia ‘oe ‘Esitimeti hono alea’i, pea ‘e toe tapuni leva ‘ae falealea ia. Ko ‘ene tu’u koia ‘ihe ‘aho ni kuo ‘ikai ke mo’oni ‘ae lau ia koia, he koe ngaahi ‘u Lao ‘eni ia ‘e 7 kuo ‘osi fakahu mai ia kihe falealea, tukukehe ‘ae ‘Esitimeti. Pea ‘oku toe ‘iai foki moe ngaahi issue kehe matu’aki mahu’inga kihe falealea moe fonua ‘oku totonu ke fai ha lau ia kiai ‘ae falealea, pea kau kiai moe ngaahi fokotu’utu’u koia kihe ngaahi liliu faka-politikale.

KELE’A: ‘Oku ‘iai nai ha me’a fo’ou ‘oku hoko ‘ihe falealea ‘i ho’o mou hu atu koia ‘ihe ta’u ni?

‘AKILISI: ‘Io, ‘oku ‘iai ‘ae me’a fo’ou ‘aupito ‘ihe ‘ene tu’u koia ‘ae falealea ‘o Tonga he ‘aho ni ‘o fakatatau kihe ta’u ‘e 21 koia kuou fakakaungatamaki ai ‘i falealea, ko ‘ene toki hoko ‘eni ha me’a pehe. ‘Aia koe fuofua taimi ‘eni ke tomui mai ai ‘a hono fakahu mai ki falealea ‘ae ‘Esitimeti, a’u ‘o laka hake ‘ihe uike ‘e taha. Pea koe tomui ko ‘eni ‘oku ‘iai ‘ae fifili lahi ‘aupito kiai pea ‘oku mau tui, koe anga ‘o ‘emau fakafuofua ‘oku ‘iai ‘ae faingata’a’ia lahi ‘ihe Pule’anga ‘a hono fokotu’utu’u koia ‘oe Patiseti, tautautefito ‘ihe ngaahi ma’u’anga pa’anga maheni ‘ae Pule’anga. Ko hono ua, ko hono vahevahe ko ee ‘oe pa’anga koia ‘oku ou tui ‘oku kau pe moia ‘ihe palopalema’ia ai ‘ae Hou’eiki Kapineti moe kau Minisita. Pea ‘oku toe tanaki atu foki kiai moe no ko ‘eni pa’anga ‘e 112 miliona hono kanoni’aki ia ‘oe faingata’a ko ‘eni ‘oku fehangahangai moe Pule’anga ‘ae fu’u no koia pe ‘e anga fefee ‘a hono vahevahe. He ‘oku ‘iai foki ‘ae ngaahi fehu’i mahu’inga ia ‘oku fekau’aki pea moe 112 miliona ‘o hange ko ‘eni; Koe ha ‘oe taumu’a totonu ‘oe no koia pea ‘oku anga fefee ‘a hono malu’i ‘oe no, pea koe ha ‘ae interest pe koe totongi tupu pea ‘e ta ‘ihe ta’u ‘e fiha? Koe hoko ‘e anga fefee hono vahevahe ‘oe pa’anga ‘e 112 miliona ko ‘eni? Pea koe ha ‘ae ngaahi Pisinisi mo kinautolu ‘aia ‘e faka’ataa kinautolu kihe pa’anga ko ‘eni? ‘Aia ‘oku lahi ‘aupito ‘ae ngaahi me’a ia fekau’aki pea moe makatu’unga koia ne tupu mei ai ‘ae palopalema ko ‘eni ‘oe tomui mai hono fakahu mai ‘ae Patiseti moe ‘Esitimeti koia ‘oe ta’u ni. Koe me’a foki ‘e taha ‘oku mau toe sio atu pe kiai, ‘oku ‘asi mai ‘ihe anga koee ‘oe kamata mai koee ‘o ‘emau feme’a’aki, ‘oku ‘iai ‘ae faingata’a’ia ia ‘ihe tafa’aki ko ‘eni ‘ae Pule’anga, pea ‘oku ‘ikai ke fu’u mahino kiatekimautolu pe koeha koaa e ‘uhinga ‘oe faingata’a ko ‘eni?

KELE’A: Fekau’aki koia pea moe to-folofola huufi ‘oe falealea, na’e ‘iai ha me’a na’a mou ‘amanaki ‘e ‘asi mai ai?

‘AKILISI: Koe taha ‘oe issue na’a mau fakakaukau mautolu ‘e ‘asi mai ‘ihe to-folofola, ‘oku ‘iai ha fokotu’utu’u ‘ae Pule’anga kihe ngaahi me’a faka-politikale. Ka na’e ‘ikai ke ‘asi mai ha me’a pehe ia ‘ihe to-folofola, pea na’e ‘ikai pe ke toe ‘asi mai ha lau ia, pe temau fanongo atu ‘oku ‘iai ha lau ‘ae Palemia moe Hou’eiki Minisita ‘o kau kihe ngaahi fokotu’utu’u ko ‘eni kihe faka-lelei faka-politikale. ‘Ihe taimi tatau ‘oku totonu ke mahino kihe Tu’i, pea mahino kihe Palemia koe issue ‘eni ‘oku nofo ai ‘ae kakai he ‘aho ni. Pea neongo tenau oo kinautolu ‘o feinga ke teketeke’i e me’a koia mo ‘ave ia ‘o tuku fakatafa’aki atu, pea koe me’a ‘oku totonu ke mahino kihe Pule’anga, ‘oku totonu kenau fakaofiofi ma’u pe kihe me’a koia ‘oku nofo ai ‘ae loto ‘oe kakai tokolahitaha ‘oe Fonua. Pea koe issue koia ‘o fekau’aki moe faka-lelei faka-politikale, koe issue ia ‘oku fai kiai ‘ae tokanga lahi ‘ae kakai ‘oe fonua, pea tanaki atu kiai moe fu’u no pa’anga ‘e 112 miliona. Koia ‘oku ou pehe ‘e au ‘ihe anga ‘o ‘eku fakakaukau fakapotopoto, ‘oku mahu’inga ‘aupito ‘aupito kihe Pule’anga kenau hanga ‘o fakakaukau’i fakapotopoto pea nau fakaofiofi kihe ngaahi me’a koia ‘oku nofo ai ‘ae loto moe fakakaukau ‘oe kakai. Pea ‘oua tenau fakamama’o mei ai, pea teu lau ‘e au ia ‘ae fakamama’o koia, ko hono teketeke’i pe ko hono ta’etokanga’i mo ta’etoka’i ‘ae ngaahi me’a ko ee ‘oku tui kiai ‘ae kakai ‘oe fonua ko ‘eni. Pea koe ngaahi me’a koia, he ‘ikai tene fakatupu ‘e ia ha nofo melino, kapau he ‘ikai ke hanga ‘ehe Pule’anga ‘o tokangaekina ‘ae ngaahi me’a ‘oku tokanga kiai ‘ae kakai, kae tautautefito kihe issue ko ‘eni kihe liliu.

KELE’A: Koe tuai ko ‘eni ‘a hono tufa atu koia ‘oe Patiseti kihe ta’u ni, ‘oku ke tui ‘oku kei taimi lelei pe ia ke toki alea’i ‘o fakatatau kihe ki’i taimi ko ‘eni ‘oku toe kihe ‘aho faka’osi ‘o Sune?

‘AKILISI: ‘Oku ‘ikai foki koha me’afo’ou ia kihe Pule’anga ‘enau hanga koia ‘o fika’i, pe ‘oku nau hanga pe ‘e kinautolu ia ‘o palani’i ha fa’ahinga me’a ‘oku faka’amu e Pule’anga kenau fakahoko ‘ihe ‘ilo’ilo pau he ko kinautolu pe ‘oku tokolahi ‘i falealea. Pea neongo ‘ae toesi’i ‘ae taimi moe lahi ‘ae ngaahi ngaue koia ke fai kihe Patiseti, ka ‘oku ou tui au kuo anu ‘osi hang ape ‘e kinautolu ‘o fokotu’utu’u, pea hange pe ‘eni ia ha va’inga ha va’inga ha fo’i Timi. Pea ‘oku ou tui au kuo nau ‘osi hanga  pe ‘e kinautolu ‘o palani ‘ae me’a ko ‘eni, koe ‘uhi ‘oku nau tokolahi, pea mahalo pe ‘oku nau toe fakafalala kihe kau Nopele. Pea neongo e si’isi’i e taimi, ka koeha pe me’a koia tenau ‘unu kinautolu kiai, koe me’a ia ‘e tali, pea ‘oku ‘ikai kenau fu’u hoha’a kinautolu pe ‘oku lava lelei ‘ae fatongia koia pe ‘ikai. Koe me’a pe ‘oku kei ‘asi ‘o a’u mai kihe ‘aho ni, ‘ae tu’u ta’epalanisi koia ‘ae Falealea moe ngaue’aki pe ‘ae tokolahi, koe ngaue’aki koia ‘ae tokolahi koe me’a ia ‘e fakalele’aki ‘ae falealea, ka ‘oku ‘ikai ke fakalele’aki ‘ae falealea ia ‘aki ha ngaahi fakakaukau fakapotopoto pea moe loto koia ‘oe tokolahi. Pea ‘oku tau kei lele pe kitautolu ‘ihe founga motu’a, pea tenau fakafalala pe kinautolu ki he’enau tokolahi, pea tanaki moe ni’ihi ‘oe Hou’eiki Nopele ‘o fakataha’i kinautolu kenau fai’aki hono fakalele mo hono pule’i ‘oe falealea.

KELE’A: ‘Ihe ta’u koia ‘e uofulu tupu ho’o hoko ai koe Fakafofonga ‘ae kakai kihe falealea, koe ha ho’o ongo’i koia kihe to’u-falealea ‘oe ta’u ni ‘o fakafehoanaki kihe ngaahi ta’u kuohili?

‘AKILISI: ‘Oku ou tui ‘oku totonu ke fai ha tokanga lahi ‘ae Pule’anga pea moe falealea kihe me’a koia na’e hoko ‘i Novema ‘oe ta’u kuo’osi. Pea ‘oku totonu ke mahino kihe Pule’anga pea pehe kihe Tu’i, Tupou V, ‘ae ‘uhinga na’e hoko ai ‘ae me’a ko ‘eni. Neongo kuo hanga ‘enautolu ‘o ta tikite kimautolu ‘o tukuaki’i mautolu ‘o pehe ko kimautolu na’a mau hanga ‘o fakatupu, ka koe taha ia ha issue pelepelengesi pea he ‘ikai ke tonu kenau hanga ‘enautolu ia ‘o teke’i katoa ‘ae me’a koia ‘o pehe koe kau Fakafofonga na’a nau hanga ‘o fakalanga. Koe me’a ia koia ia ‘oku ‘iai ‘ae kaunga katoa kiai ‘ae Kapineti ia moe Pule’anga, pea ‘e malava pe ia keu pehe ‘e au ia ‘ihe lau ‘a’aku, ‘e pau ke hilifaki kiakinautolu ia ‘ae nunu’a koia moe ‘uhinga ‘oe me’a koia ne hoko ‘ihe ta’u kuo’osi. Koe anga koia ‘o ‘eku taukei koia ‘ihe Falealea, pea mo ‘eku ongo’i, ‘oku totonu ke fai ha tokanga lahi ‘ae Pule’anga kapau ‘oku nau loto mo’oni ke ta’ofi ‘oua na’a toe hoko ha moveuveu ‘ihe fonua ni, pea ‘oku totonu kenau tokanga ‘aupito ‘o fakapapau’i ko ‘enau fo’i fokotu’utu’u kotoa pe tenau fakahu mai ki falealea ‘oku tonu pea fakaofiofi ma’u pe kihe me’a ‘oku loto kiai ‘ae kakai. Ko ‘eku ongo’i koia ‘ihe ‘aho ni, ‘oku te’eki ai ke ‘asi mai ha founga ia moha fokotu’utu’u meihe Pule’anga ke pehe ke kamata leva ke fai ha fepotalanoa’aki ‘ae ongo fa’ahi pea fai ha fakalelei, pea ketau hanga taha atu kihe kaha’u mo tau fakakaukau’i fakataha pe koeha e me’a ‘oku tonu ke hu’u kiai ‘ae fonua ‘ihe kaha’u.

KELE’A: Koeha ‘ae anga ho’o vakai koia kihe Palemia moe Pule’anga ‘i ho’o mou kamata koia ‘ihe ta’u ni?

‘AKILISI: ‘Oku kei ‘asi mai pe ‘ae loto tangia meihe tafa’aki ‘ae Pule’anga, pea kei ‘asi mai pe meihe Pule’anga ‘ae loto sauni pea moe taaufehi’a, pea ‘oku ‘ikai ke puli ia. Pea teu ‘oatu ha fakatataa ‘e taha kene fakamo’oni’i atu; Koe award pe koe pale koia na’e foaki kihe ‘Etita ‘oe Kele’a, Tavake Fusimalohi ‘ehe PINA, ‘ae Kautaha Nusipepa ia ‘ae Pasifiki. Koe taha ‘eni ha me’a mahu’inga, pea ‘oku ‘ikai ke ngata pe ki Tonga ni ka kihe Pasifiki. Koe anga maheni, koe taimi koia kuo foaki ai ha pale pehe kiha taha, ‘iha fa’ahinga fonua pe, pea ‘oku hanga leva ‘ehe ngaahi media moe ngaahi Kautaha ongoongo ‘o tufaki ‘ae ngaahi me’a koia ke ‘ilo ‘ehe kakai ‘oe Pasifiki pea pehe foki ki mamani. Ka ko hono ta’ehanga ko ‘eni ‘ehe Letio Tonga pea moe Televisone Tonga ‘o tuku mai ‘ae fo’i ongoongo koia ke faka’inasi’aki e kakai, kae lolotonga koia kuo ‘osi talaki ia ‘ehe ngaahi Nusipepa, pea tala ‘ehe Letio moe ngaahi TV ‘ihe toenga ‘oe ngaahi fonua ‘ihe Pasifiki, pea ‘oku ne hanga leva ‘o faka’ali’ali mai ‘ae me’a ko ‘eni; 1] ‘Oku kei ‘iai pe ‘ae loto sauni moe loto taaufehi’a ‘ihe Palemia moe kau Minisita moe Pule’anga. 2] ‘Oku ‘iai ‘ae lau lanu ‘oku ‘asi meihe Pule’anga. 3] ‘Oku ‘asi mai ‘oku nau kei feinga pe kinautolu ke lolomi hifo ke ‘oua na’a toe ‘asi hake kae tautautefito kiha taha ‘oku ne tu’u meihe tafa’aki koia ‘oe feinga liliu ‘o hange koia koe Nusipepa Kele’a moe Kautaha Totonu ‘ae Tangata moe Temokalati pea moe Komiti ko ‘eni ‘ae kakai kihe Faka-lelei Faka-politikale. ‘Oku talamai ‘ehe ki’i fo’i me’a pe ‘e taha ko ‘eni tukukehe ‘ae ngaahi me’akehe teu ala fakatataa kiai, ‘oku talamai hono ta’ehanga ‘ehe Letio Tonga, pea Letio Tonga pe taha ‘ihe Pasifiki moe Televisone Tonga, kena hanga ‘o faka’inasi’aki e kakai ‘aki ‘ae fo’i award mahu’inga koia, ‘ae kei nofo pe ‘ae Palemia moe Pule’anga moe loto ‘ita moe loto sauni, taaufehi’a pea moe fakavahavaha’a moe lau lanu. ‘Aia koe tui ‘a’aku ‘oku ‘ikai koha faka’ilonga lelei ia ‘oku totonu ke kei ‘asi mai meihe Pule’anga ‘o a’u mai kihe ‘aho ni, talu meihe ‘osi koia ‘ae palopalema koia ne hoko ‘ihe ta’u kuo ‘osi.

KELE’A: Koe ha ha’o lau kihe ngaahi fakaanga ‘a Kalafi moe Taimi kuo nau fa’a fakahoko mai kiate koe?

‘AKILISI: Ko ‘eku lave kiai, ‘oku ‘ikai foki keu fie fakamoleki hoku taimi ke tali ‘ae ngaahi fakaanga koia ‘oku fa’a fakahoko mai ‘ehe Taimi ‘o Tonga, pea ‘oku nau tau’ataina pe kinautolu kenau fakaanga’i au, pea ‘oku ‘ikai koha me’a ia keu fu’u hoha’a au kiai. Ka ‘oku ‘iai ‘ae ngaahi me’asivi ‘oku totonu ke fai mo fakatokanga’i ‘ehe Taimi, pe ‘oku tonu koaa ‘enau hanga ‘o fakaanga’i au. Koe taha ‘oe me’asivi koia, pea ‘oku ke ‘uhinga ‘eku fai ‘e au ‘ae lau koia, he ‘oku ‘iai ‘eku pikinga kihe Kele’a he koe Nusipepa ‘oku kaunga kiai ‘eku fanau. Pea ‘oku totonu ke fai mo mahino ia kihe Palemia moe Pule’anga, koe Taimi ‘o Tonga koe Palemia pe ia, pea ‘oku hange pe ia ha Pepa ‘ae Palemia. Pea ‘oku ne fetongi ‘e ia ‘ae tu’unga koia ‘oe Kalonikali Tonga. Koe SEKILEISONI KOIA pea moe anga ‘oe tu’u koia ‘oe Nusipepa ki hono manakoa koia ‘ehe kakai, pea mahalo ‘oku tonu pe ‘eku hanga ‘o fakalea ko ‘eni, koe Kele’a koe Pepa ia ‘oku manakoa lahitaha ‘ehe kakai, pea ‘oku nau fie lau ai. ‘Aia ko ‘enau lau koia ‘ihe Kele’a teu pehe ‘e au ia, ‘oku totonu ke hanga ‘ehe Pule’anga ia ‘o fakatokanga’i ‘ae tafa’aki koia. Pea hange koe me’a koia koee na’aku lave kiai ‘anenai, kapau ‘oku nau feinga ke tukuhifo au ki lalo pea ‘oku totonu ke ‘asi ‘ae ola koia ‘ihe ‘enau feinga kenau tukuhifo au ki lalo ‘ihe anga koia ‘oe fakahoa atu kihe fakatau pepa ‘ae kakai. Pea koe me’a leva ‘oku ‘asi mai, koe lahi’ange koia ‘enau lea mai kiate au, koe fakautuutu ange ia ‘ae manakoa ‘oe Nusipepa ko ‘eni pea mahalo ‘oku ‘iai pe moha toe ngaahi ‘uhinga kehe ke tanaki atu kiai. Ka ‘oku totonu ke fakakaukau lelei ‘ae Palemia moe Pule’anga ‘e tokoni kapau tenau fai ha’a nau ki’i savea kihe tu’unga koia ‘oe ngaahi Nusipepa he’e lava lelei pe ai ke mahino, koe fekau mahu’inga ia ‘oku talamai ‘ehe Nusipepa ko ‘eni. Kaikehe, koe lau mai koia ‘ae Taimi kiate au, ‘oku ‘ikai ke ‘iai ha’aku lave ‘a’aku kiai he ‘oku nau tau’ataina pe kinautolu kenau lave mai kiate au pea ‘oku ou pehe ‘oku ‘ikai koha fu’u me’a ia keu tokanga au kiai. Ka ‘oku totonu pe kenau toe ki’i vakavakai’i ange ‘ae tu’unga ‘oku ‘iai ‘enau Nusipepa . Na’aku lau hifo ‘ihe tohi ‘Etita na’e ha ‘ihe Nusipepa, pea ‘oku ou pehe ko’ene tonu taha ia. Na’e pehe ai ‘ehe tokotaha ko ‘eni, koe Taimi ‘o Tonga koe Nusipepa ia ‘ae Palemia. Pea kou pehe koe taha ia ha lau mamafa mo’oni kihe Palemia mo Kalafi. Pea na’e toe pehe ‘ehe tokotaha ko ‘eni ko Feleti Sevele ‘oku ne hanga ‘o invest ‘ae Taimi ‘o Tonga, pea ‘oku totonu ke ‘ai ha tali kiai ‘a Feleti mo Kalafi, he koe taha ia ha lau mamafa mo’oni.

KELE’A: Koe faka’osi, ‘oku lahi ‘ae ni’ihi ‘oku nau fetu’utaki mai ko ‘enau fie’ilo kihe tu’unga koia ‘oku ‘iai ‘a ho’o mou hopo, keke lave faka’osi mai ai ke ‘ilo pea mea’i ‘ehe kakai ‘oe fonua.

‘AKILISI: Ko ‘emau hopo, kuo ‘osi fai e tu’utu’uni ‘ae Fakamaau pea ‘oku ou faka’apa’apa lahi kihe tu’utu’uni koia ‘ae Fakamaau, pea ‘oku ou loto au ke ‘ave ‘emau hopo kihe Fakamaau’anga Lahi. He ‘oku ou faka’amu au ke ‘iai ha faingamalie ke faka’eke’eke ai kimautolu pea mo ui ha’a mau kau Fakamo’oni, koe’uhi kenau hanga ‘o ‘omai kotoa ‘ae ngaahi mo’oni kotoa pe na’e ‘ikai ke ‘asi ‘ihe Fakamaau’anga Polisi faka’eke’eke. Pea ke ‘ohake ia ‘ihe ‘ao ‘oe Fakamaau’anga Lahi kene fai mei ai hano ‘analaiso pea toki makatu’unga ai ‘ene tu’utu’uni. Koe me’a ia ‘oku ou fiefia ai ‘i hono fo’i ‘ave ko ‘eni keu ma’u ai ha faingamalie moe toenga ‘oe kau Fakafofonga ‘oe kakai kemau hanga ‘o ‘omai katoa ‘ae ngaahi ‘u me’a ‘oku mau tui ‘oku ‘iai ‘ene kaunga hangatonu kihe faka’ilo ko ‘eni na’e fai ke tu’unga ai. Pea ‘oku ou tui ‘e ‘osi ange ‘ae hopo ko ‘eni moe talatu’utu’uni ‘e toe ‘iai ‘ae fu’u maama lahi ‘aupito tene hanga ‘o hulu’i mai kihe kakai ‘oe fonua ketau fononga atu ai kihe kaha’u.                             

- mei he Kele'a