October 17, 2007                                        News You Can Trust!!                                      Volume 7

Fakahāhā kakai he Fataha Forum

Tofoa - Na'e ta'ofi 'e he kau polisi, kau sotia pea mo e pule'anga 'a e laka fakahāhā 'a e kau poupou ki he Temokalati 'i he 'aho Tusite, 16 'o 'Okatopa, 2007, 'a ia na'e teu ke fakahoko lolotonga 'a e huufi 'o e Fakataha hono 38 'a e kau Taki 'o e Pasifiki, na'e fakahoko 'i mala'e Pangai.

Na'e toe fakaloloa ai 'e he pule'anga Tonga 'a e fakataputapui, 'o nau poloka mo le'ohi 'a e ngaahi hala ne tapuni 'i he kuohili.  Kau ai 'a e tapafa 'o Nuku'alofa, Hala Salote pea ngaahi feitu'u ofi ki palasi.

Ne 'osi fakaha pe foki 'e he kau poupou Temokalati te nau laka lolotonga 'a e fakataha, pea 'oku 'i ai 'a e tui, ko e tupunga ia hono toe fakahoko 'a e fakataputapui mo e tatapuni 'a e ngaahi hala pule'anga.  Pea kiu 'a e ngaahi me'alele mo fihi 'a e hala 'i he 'elia Nuku'alofa, 'i hono toe tapuni ko 'eni 'a e ngaahi hala, neongo kuo 'osi lele lelei mai 'i he ngaahi mahina kuohili.

Na'e fakataha ai 'a e ni'ihi 'o e kau fakafofonga 'o e kakai, kau pisinisi Tonga pea mo e kakai tokolahi ki he Sipaila 'i Tofoa 'o fakahoko ai 'enau ngaahi lea, pea tau 'banner' 'a e ongo kauhala pehe ki he'enau ngaahi me'alele.

Pea ne le'ohi pe 'e he kau polisi 'a e 'elia ni, neongo 'a e 'uha.  Pea lele holo pe 'a e loli 'a e kau sotia 'i he Hala Taufa'ahau mo e Hala Maumaukoula, ko e manavasi'i na'a toe fai 'e he kakai ha fakahahaloto.

Fakatatau ki he lau 'a e taki 'o e fonua 'e taha, na'a ne pehe, 'oku filifilimanaki 'a 'Aositelelia mo Nu'u Sila, he 'oku nau poupou'i 'a e temokalati 'i Fisi mo e ngaahi fonua kehe.  Ka 'i Tonga ni, 'oku 'ikai ha fie poupou mo tokoni 'a e ongo fonua ni ki he feinga liliu faka-Temokalati 'i Tonga ni.

'Oku folau atu 'a e kau taki fonua ki Vava'u he 'aho ni ke hoko atu ai 'a e fakataha, ka 'oku talitali pe 'a e kakai 'i Sipaila ke fakahaa'i honau loto ki he kau taki 'o e ngaahi fonua temokalati he Pasifiki.