October 17, 2007                                        News You Can Trust!!                                      Volume 7

KAUTAHA ‘AE KAU NGĀUE FAKAPULE’ANGÁ

Ngaahi Ongoongo & Fanongongo

 1.              Kole ke Fakalōloa ‘ae MOÚ:  Na’e ‘ave ‘ae kolomú ni ‘o paaki ‘ihe ‘aho Tokonaki kuo’osí ‘oku te’eki pē ke ma’u mai ha tali kihe ‘etau kole ke fai ha fakataha moe Palēmiá, ‘aia na’e ‘oange ‘ae faingamālié ‘ihe mahina ‘eni ‘e 3 pea na’e ngata ‘aneafi.  Koe me’a kuo mahino maί kau Mēmipa, ‘oku ‘ikai fie talanoa mai ‘ae Fakafofonga (Palēmiá ma’ae Kapineti)  ‘oe Pule’anga ‘oku Fakamo’oni (Signatory) ‘ihe MOÚ mo kitautolu ketau feinga ke fakalelei ‘etau ngaahi ngāue fakalotofalé ‘ihe founga ‘oku melinó.  ‘Oku mahino ‘enau ta’efietalanoa maί ‘ihe ‘enau toe faitohi mai ‘o ‘eke pē kohai ia ‘oku fakafofonga’i ‘ehe PSÁ.  Koehā ‘ae me’a ‘oku nau feinga mai kiai?  Ketau tuku ‘ae ngāué katau ō atu ‘o tangutu kotoa ‘i tu’a ‘ihe ‘ofisi ‘oe Palēmiá (he kuo tapui ‘a Pangai Si’i) kenau sio mai pē kohai ia ‘ae kau Mēmipa moe tokolahi ‘oe PSA?

Koe talu ‘ae fakamo’oni ‘etau MOÚ ‘ihe 2005 moe lahi ‘ae ngaahi tohi kuo ‘ave kihe Kapinetί ‘o fakahoko atu ‘enau ngaahi ngāue kuo nau maumau’i ai ‘etau MOÚ kae ‘ikai pē kenau tokanga mai ke solova ‘ae ngāue koiá.  ‘Aia ko hono ‘ai mahinó na’a nau fakamo’oni pē ‘ae MOÚ kae fai mo fai ha foki kihe ngāué pea nau foki leva ki honau ‘ulungaanga fakatikitato ke fai pē ‘enau me’a ‘oku nau loto kenau faitu’utu’uni aί kae ‘iai kenau fou ‘ihe founga koē ‘oku fai ai ‘ae ngāue fakatahá moe melinó kae lava ke laka kimu’a ‘ae ngāué.  Koehā leva ‘ae ‘aonga ‘enau ako kihe “Pule Leleí” pe “Good Governance” na’a nau ‘asi mai ai ‘ihe TV ‘o fakamatala?  ‘Osi pē ‘ae akó ‘oku hoko pē ko ‘enau fo’i kemipeini tokua ‘oku fai ha feinga ke fakalele’i ‘enau founga taki ngāué hili koiá koe fo’i koto laulaupisi mo maumau pa’anga ‘ata’atā pē pea na’e mei ‘aonga ange ke ‘ai ‘ae sēniti koiá ke vahe ai ha kau faiako fo’ou ke si’i tokoni’i ‘ae fānau akó.

Koe me’a tatau tofu pē eni moe me’a na’e hoko ‘ihe ‘aho 16/11.  Na’e hoko ‘ae moveuveú koe faitu’utu’uni ta’efakapotopoto ‘ae Palēmiá moe Kapinetί ‘ihe ‘enau feinga ke kumi ‘enau lelei fakafo’ituituί ‘ihe ‘enau ki’i mōtolo na’a nau kole kihe Tu’í kene tali ke talaki koe mōtolo ‘ae Pule’angá kae tuku ‘ae me’a na’a tau tali kiaí na’e takai haufano holo ‘ae Tama Tu’ipelehake kuó ne mama’ó ‘o fekumi kiai ‘ihe loto ‘oe Kakai ‘oe Fonuá, mo ‘enau feinga ke tu’u pē honau mafai halá he’ikai ke fie fakaava ‘a Falealea ke fai ai ‘ae talanoá pea tau iku ai kihe ‘auha ‘a loto Nuku’alofá.  ‘Ihe ‘enau toki sio kuo hoko ‘ae fakatamakί ‘ihe ‘enau ta’e’unua ‘ihe ‘enau ki’i mōtoló pea nau fakamo’oni leva ‘ihe aleapau moe Kakaí pea ‘ihe ‘ahó ni kuo nau hangahanga kehe leva pea teke leva ‘ehe Palēmiá ke toloi ‘ae fili Falealeá meihe 2008 kae kei momono hake aipē ‘enau ki’i mōtolo na’e tutu’aki ‘a Nuku’alofá ke toe fai hono talatalanoa’i koā ‘ihe ava ‘ae Falealeá ‘o hangē koe tō folofola ‘ae Tu’í ‘ihe tapuni ‘ae Falealeá ‘ihe ta’u kuo’osí.  He kohai ‘oku ne fa’u ‘ae folofola tāpuni ‘ae Tu’í kihe Falealea?  ‘Ikai koe Palēmia?  Pea ‘oku nau (Kapineti) ‘ilo foki ‘oku nau aofangatuku ‘ae me’a kotoa ko ‘enau tokolahi ‘ihe Falealeá pea ‘e lava pe kanau fakapaasi pē ‘ae me’a ‘oku nau loto kiaí kae tuku ‘ae ‘ai koā ke pehē koe ‘ai ke fai ha talatalanoa ‘i Falealea ka koe founga pe ia ke toloi’aki ‘ae Fakalelei Fakapolitikalé kihe 2011 pea hoko pē koe fu’u koto maumau pa’anga ‘ae si’i me’a holo ‘ae Tu’ipelehake kuo ne ungafonuá, tapu moia. 

Koe me’a tatau pe eni kihe ‘enau (Kapineti) vilitaki ke fai ‘ae alea’i ‘ae nō laui miliona mei Siainá ‘oku ‘uluaki totonu ke fakangofua ‘ehe Falealeá pea toki fai ‘ae alea kihe noó.  ‘Oku ‘iai nai ha ‘uhinga kehe ‘oku fakavave’i ai ‘ae nō laui milioná kae ‘ikai kenau ‘uluaki femo’uekina ‘ihe kamata’anga ‘oe ta’u ní ke fakahoko ‘ae ngaahi ngāue ke fakapapau’i ‘ae Fakalelei Fakapolitikalé ke fa’u ‘ae Pule’anga Fakatemokalati koia ‘oku taliui kihe Kakaί pea toki fai ‘ehe Pule’anga Fakatemokalati koiá ‘ae nō?  Koe ‘ai ‘ae nō koenί pea felekeu ‘ae pa’angá ‘o hangē koe ngaahi laui miliona kuo tau mātā tonu ‘ene felekeú pea toki fai ‘ae Fakalelei Fakapolitikalé ‘o toki ha’u ‘ae Pule’anga Fakatemokaliti fo’oú ia feinga ke fakamā’opo’opo ‘ae ngāue hala mo felekeu ‘oe ngaahi ‘ahó ni pea ‘e tukuaki’i leva ia ko ‘enau ngāue, kae ‘ela mai ‘ae Pule’anga lolotongá ia ‘i tu’a ‘o kata mai ‘ihe faingata’a kuo toe loloto ange kuo tō kiai ‘ae Fonuá ‘ihe ‘enau ngāué kaekehe kuo lava honau lotó ‘o kinautolu mo fonu honau kato? ‘Oku totonu ke toe tokanga ange ‘ae Palēmiá na’a si’isi’i ‘ae tukungāue ‘oe 2005 moe maumau ‘oe 2006, ha me’a ‘e hoko ‘ihe 2007 he koe fika Faka’otua ‘ae 7.

Mou fakaongoongo mai pe kau Mēmipá he kuo tau paasi eni meihe taimi talanoa fakalelei moe Palēmiá koe Fakamo’oni (Signatory) ‘oe MOÚ pea tetau hoko atu leva kitautolu kihe ‘etau founga ‘oku tau ‘ilo ‘e lava ai ke fanongo mai aί.  ‘Oku toe pē ‘ae mahina ‘e taha pea ‘osi ‘etau MOÚ.

2. Fakatonutonu Faka-fakamaau’anga kihe Fakamaau Totonú:  ‘Oku tau kei fakaongoongo kiha ‘aho ‘e tukumai ai ‘ehe Fakamaau’angá kihe fakatonutonu koeni ‘ihe funga ‘o ‘etau MOÚ ke fakamahino pē na’e maumau’i ‘ehe Pule’angá ‘etau aleapau ‘ihe ‘enau ta’ofi ‘etau ngaahi monū’iá. 

Hangē na’e hā atu ‘ihe kolomu ‘oe uike kuo ‘osί kuo ma’u mai ha lāunga fekau’aki moe to’o fakamālohi ‘ehe Pule’angá (PSC) ‘a ‘etau ngaahi ‘aho malōlō (earned leave days) ‘o ‘ikai ha’atau teitei ‘ilo ‘e taha kiai.  Fakatatau kihe lāungá, na’e tu’utu’uni ‘ehe PSC ‘ihe ta’u kuo ‘osí ke kamata ‘i Siulai 2006 he’ikai toe ma’u ha ‘aho malōlō ‘aha taha kapau ‘oku te’eki ai ke fakahoko ‘ene livi malōlō (vacation leave) ‘iha fo’i ta’u hokohoko ‘e nima.  Fakatokanga’i ange koe tu’u ‘ae Tu’utu’uni ‘ihe Lao kihe kau Ngāue Fakapule’angá, koe ‘osi pē ‘ae mahina ‘e taha ho’o ngāué kuopau ke ‘oatu ho’o ‘aho malōlō ‘e 3.  Koia ko kimoutolu ‘oku te’eki kemou livi malōlō ‘ihe ta’u ‘e 5 ‘ihe ‘ene a’umai ki Sune 2006 na’e kamata ‘ae ‘ikai toe foaki atu ho’o monū’ia ‘aho malōlō ‘e 3 ‘ihe māhina talu mei Siulai 2006 kae ‘ikai keke ‘ilo ia ‘e koe.  ‘Oku tokolahi ‘ae ni’ini ‘oku nau to’o pē ‘enau malōlō makehe (special leave) ‘ihe ta’u kotoa, ka ‘oku ‘ikai fakalau ‘eni ia ‘ehe Pule’angá ko ha’o vacation leave.  Koe me’a ‘eni ‘oku ui koe kaiha’a fakamālohi ho’atāina (daylight robbing) ‘ihe ‘enau fakahoko ‘ae tu’utu’uní kae ‘ikai talamai kimu’a ketau fakahoko ‘a ‘etau malōloó kei taimi ke ‘aonga ‘etau tou’anga ‘ihe ngāue na’e faí.

Na’e toe paasi pe ‘ihe ta’u kuo ‘osí ke fakangatangata pē ‘aho malōloó kihe ‘aho ‘e 180.  ‘Oku tokolahi ‘ae kau ngāue ‘oku ‘ova ‘enau ngaahi ‘aho malōloó ‘ihe ‘aho ‘e 180 koe’uhí ko hono fiema’u kenau nofo ‘o fai ‘ae ngāué he’oku ‘ikai ha taha kene fetongi kinautolu.  ‘Ihe tu’utu’uni ko ení kuo mole ai ‘enau ngaahi ‘aho ‘oku ‘ová koe’uhí pe ko ‘enau nofo ‘o māteaki’i ‘ae ngāué.  Hangē kuo totongi’aki ai ‘ae koví ‘ae leleí.

Koe natula foki ‘ae fa’ahinga ngāue ‘aha ngāue’anga, kapau ‘oku fai ‘ehe Taki ngāué ha tu’utu’uni kihe ‘ene kau ngāué kuopau kene fakahoko kiate kinautolu.  Ka ‘oku tau fakame’apango’ia ‘ihe founga Taki ngāue ko ení ‘oku hangē ‘oku nau fakalongolongo pe kanau kaiha’asi ‘etau ngaahi monu’ia ta’etalamai ketau ‘ilo’I ke fai ha’atau ngaue kiai?   Pea koe me’a faka’ulia ia koe nofo ‘ae kau ngaue ‘o mateaki’i ‘ae ngaue kae totongi tautea kinautolu?  ‘Oku anga fēfē ‘ae fakakaukau ‘ae Palēmia mo ‘ene Potungāue (PSC)?

‘Oku mahino kau Mēmipa ‘oku tokolahi ‘ia kimoutolu ‘oku mou fihia he palopalema koeni kae ‘ikai te mou ‘ilo’i ‘e kimoutolu tukukehe ka ‘ai ke fai ho’omou livi malōló.  ‘E fai kole ki he Pule’angá (PSC) ke fai ha ngāue ke fakatonutonu ‘ae tu’utu’uni koení.  Ko ia ko kimoutolu ‘oku mou ‘ilo’i ‘oku mole ho’omou ngaahi monū’ia he tu’utu’uni koení pea moe fetu’utaki telefoni mai pe ki hotau ‘ofisí ke fakakau koe ‘ihe kole koeni ‘e faí.  Koe ngāue fakahela eni he mahalo tetau iku pe kihe fakamaau’anga ‘o fai mei ai ‘ae fakatonutonú.

2.             Kautaha Nō (Credit Union - CU):  ‘Oku ‘oatu heni ‘ae fakamālō lahi kiate kimoutolu kau Mēmipa meihengaahi ‘Otu Motú he lava lelei mai ‘a ‘etau Saveá moe ngaahi lesista ki he CÚ mo ‘etau Kautahá.  ‘E fakahoko atu ‘ae taimi tēpile ‘ae folau atu ‘etau Sekelitalí ‘ihe kolomu ‘oe uike kaha’u ke faka’osi mai ‘ae ngaahi lesistá, ‘ai mai ho’omou ngaahi tā paasipooti ke ngaohi ‘aki ho’omou ngaahi kaati mēmipá (ID), mo fakahoko ho’omou ngaahi fakataha ke fili mai ho’omou kau Fakafofongá, ‘o tautau toko 2 meihemotu.

3.              Kautaha Fakavaha’apule’anga ‘ae Kau Ngāue Fakapule’angá:  Kuo hoko atu foki ‘etau Kautahá ko ha mēmipa ‘ihe Kautaha Fakavaha’apule’anga ‘ae Kau Ngāue Fakapule’angá (Public Service International – PSI).  ‘Oku fakafuofua foki ki he toko 20 miliona ‘ae kau Mēmipa ‘oe PSÍ meihengaahi fonua kehekehe ‘i mamani.  Koe ‘uluaki tokoni kuo tau ma’u meihePSÍ koe fakafolau atu ‘etau Sekelitalí, Mele ‘Amanaki, ‘ihe ‘ahó ni ke fakahoko ha ako uike ‘e taha ‘ihe ‘ofisi ‘oe NZ PSA ‘i Nu’usilá pea ‘oku tau faka’amu tene ako ai ha ngaahi fokotu’utu’u ngāue ki ha founga ke lava ke toe langa hake ai ‘etau Kautahá ki ha tu’unga ‘oku toe lelei angé.  ‘Oku tau ‘amanaki foki kiha tokoni ‘ihe kaha’u meihePSÍ ke tokoni ki he’etau langa ngāue ‘oku faí.  Kuo ‘osi fakahoko ha kole kiha tokoni ke vakai’i ‘ae ngaahi Lao ‘oku fekau’aki tonu mo kitautolú pea mo ha ngaahi ako (workshops) ke tokoni ki hiki hake ‘etau founga ngāué moe fua fatongia ‘ihe ngaue’angá ‘o fakataumu’a ke toe lelei ange ‘etau fakahoko ngāué (improve service delivery & quality of service).

Faka’apa’apa atu, In Unity & Solidarity

HO’OMOU POATE PULE

Fakatokanga’i ange ‘etau tu’asila fo’ou:  P.O. Box 2005, Fanga, Nuku’alofa, TONGA; Tel: 28-838; email: psa_secretary@yahoo.co.nz