October 17, 2007                                        News You Can Trust!!                                      Volume 7

Fakafisi Palēmia mo ho’o Kapinetí, koe founga fakamoveuveu ‘oku mou Tataki’aki ‘ae Fonuá

- Viliami Pasikala

‘Ihe ‘eku ‘ātikolo fakamuimuí, na’á ku fai ai ha tautapa kihe Pule’angá moe Palēmiá ke foki kihe sikuea ‘uluaki lipooti ‘ae kōmiti ‘a Halapuá pea fai moha fakalelei. Me’apango kuo uluisino ‘ae mo’ui ‘afungi moe kia kekeva ‘ihe ki’i Palēmia pakia fo’oú ni, pea moe fie lava me’á ni, fakataha pe mo ‘ene timi Kapineti Vaipaló. Na’á ku fakahā foki ke fakatatali moe teu langa fo’ou ‘o Nuku’alofá, kae fai ‘ae fakaleleí, hala’atā, ‘ae telinga veli pe kapitení, loketi kinautolu ki Siaina ‘o alea’i ‘ae laungeau milioná. Mahalo na’a lahi ange ‘ae maumau kihe fonuá ‘oka tali ‘ae noó ni ,’ihe maumau na’e hoko ‘ihe 16/11 ‘oe ta’u kuo ‘osí. 

‘Oku totonu koe Tonga kotoapē ke tuku ‘ae Ta’emahino, malualoi moe ilifiá katau tu’u kalikali ‘o lea’aki ‘ae mo’oni, ke malu’i hotau fonua mei ha’ane tō kiha tu’utāmaki. Tau loto lahi mo tu’u fakataha ‘o fekau’i ‘ae Palēmiá mo ‘ene Kapitení, kenau fakafisi ā, he koe founga fakatupu moveuveu ‘oku nau tataki ‘aki ‘a Tonga, pea na’a nifi ‘ae ‘aho 16/11, kae toe hoko ha tau fakalotofonua [civil war], ‘o hulu faufaua ‘ae faka’auha ‘e kaikai mongea ai ‘a hotau fonuá. Tau ako meihe Hisitōliá. Koe ngaahi fonua hau ‘o māmaní na’e ‘ikai tu’u hake honau lotó ki honau kakaí ‘ihe taimi tā ‘ae piliote ‘oe liliú. Koia ‘oku mahu’inga ketau fakafelāve’i mo ako ‘analaiso he ‘oku te’eki ai hala ‘ae hisitōliá pea moe ngaahi palofisaí, pea ‘oku tonu leva ke fenāpasi ‘ae liliú moe kuonga ‘oku tau luelue holo ai ‘i māmaní ke ako mei ai ha ngaahi to’utangata kiha me’a ‘oku lelei kihe kaha’ú.

Koe ngaahi founga tataki fakatupu moveuveu ‘ae Palēmiá mo ‘ene Kapinetí, ‘oku nau foua ‘ae ngaahi founga tatau na’e foua mai ‘ehe ngaahi fonua ‘oe mamaní, ‘aē na’á ne fakatupu ‘ae TAU ‘ULUAKI ‘a Māmani ‘ihe 1914-1918. Pea ‘oku ‘ikai koha toe loi eni, ka kuo ‘osi fakamo’oni’i  matakikila’i mai ‘ehe Hisitōliá pea ‘oku mea’i lelei pe ‘ehe kotoa ‘oe kau Minisitaá, ‘ae tupu’anga ‘oe TAU LAHI ‘ULUAKÍ, ka ‘oku nau ‘afungi pe, kia kekeva, fevalealoi mo ilifia ke tu’uaki mo taukave’i ‘ae mo’oní. Ko ho’omou tali koā ke hā? Ke tau ‘ae fonuá, kamou toki fakafisi? Koehā koā hano toe ‘aonga?

Na’e ‘ikai mei hoko ‘ae Tau lahi ‘Uluakí ka koe ngaahi fu’u kupu’i fefie [founga ngāue] mōmoa na’e ngāue’aki ‘ehe ngaahi fonua ‘i fakatoka mo tafunaki ‘aki ‘ae AFÍ (TAU LAHI 1) pea tuai pe ke mofisi ha kalofiama kuo puho ‘ae ngaahi fu’u kupu’i fefié ‘o hoko ai ‘ae TAU LAHI ‘ULUAKÍ. KAPINETI! koe founga ia ‘oku ngāue’aki ‘ehe Palēmiá mo kimoutolu kotoa, pea kapau ‘oku ‘ikai temou ‘ilo, tupu mei ho’omou ‘afungí, pea tuku pe ke toe fakamanatu atu ‘ae ngaahi fu’u kupu’i fefie mōmoá (founga ngāue) na’a nau tutu ‘a māmaní (1914-1918), pea mou toki fakahoa kamau fakatatau moe founga taki ‘ae Palēmiá pea mo kimoutolu ‘oku mou tataki ‘aki ‘a Tonga ‘ihe ‘aho ní.

Koe ngaahi ‘uhinga tefito eni (founga ngāue) na’e tupu ai ‘ae tau lahi 1.

1) Koe ‘OFA FONUA pe MATEAKI FONUÁ (NATIONALISM)

2)Koe LANGA FAKAKAUTAU (MILITARISM)

3) Koe FAKAFA’AFA’AHI (ALLIANCES SYSTEM)

 4) Koe LANGA ‘EMIPAEA (IMPERIALISM)

1. Koe ‘OFA FONUA pe MATEAKI FONUA (NATIONALISM) koe feinga ke ma’u ha fu’u kolōlia. Koe KOLŌLIÁ koe feinga ke ma’u ha fu’u ngeia pe langilangi pea koe uho pe ‘elito ‘oe kumi Ngeia pe langilangi koe fu’u mātu’aki  SIOKITA lahi faka’uli’ulia. Kapineti kataki pe kae ‘ai hangatonu atu ‘ae mo’oní, ko ho’omou tefito’i alanga mahakí koe mo’ui SIOKITA, koe tupu’anga eni ‘oe ki’i vela ‘a Nuku’alofa ‘ihe 16/11.

2. Koe LANGA FAKAKAUTAU (MILITARISM). Kapineti kuo mou uki hono fakatokolahi ‘oe kau Sōtiá, lolotonga iá ‘oku ‘ikai ha pa’anga ‘ae Pule’angá.” ‘Oku fiha ‘ae vahe ‘ae kau sōtia ‘oku nau le’o ‘ae ngaahi feitu’u ‘oku fakataputapuí,’o mavahe meihe ‘enau tefito’i  vahenga?? ‘Oku ma’u kakato ‘enau vahé pe ‘ikai?? Na’e hā’ele ‘ae Tu’í pea ke me’a atu ai Palēmia ‘o ‘a’ahi kihe tuku’anga mahafu ‘ae Sōtiá. Koe pa’anga mei fē na’e  kumi ‘aki  ‘ae mahafu? Koe laui miliona ‘e fiha ‘e ‘ave ‘e ho’omou ‘Esitimeti hokó (2007-2008) kihe Sōtiá. Kofē hotau fili ‘e si’i ‘alu ai ‘a  ‘emau fanau mo ‘emau fanga tamai ‘oku nau Sōtiá kenau tau? Pea nau si’i mate ai, kamau ta’efanau mo ta’etamai ‘ihe kaha’u? ‘Ikai koā kapineti, kuo mou toe langa ‘a  ‘etau va’a fakakautau? (Rearming).

3. Koe fa’afa’ahi (Alliances System). Na’e mavaeua ‘ae māmaní ‘ihe fakafa’afa’ahi pea nau fesiofaki ‘o teuteu pe ke tau tāmate ngaahi fonua na’a tau fa’ahi (Tripple Entente) moe ngaahi fonua na’a tau fili (Tripple Alliances). Koehā ‘ae me’a ‘oku  hoko ‘i Tonga ní. Fa’ahi ‘ae kakaí fesiofaki ia moe fa’ahi ‘ae Pule’angá. (Toe pe ha ki’i fo’i masi ke kohi’i). Mo’oni koā Kapineti ‘oku ‘ikai kemou tali ha fakalelei moe kakaí mo honau kau fakafofonga? Mo’oni koā Kapineti ‘oku mou faisoo’i (tohoaki’i) ‘ae kau Taki lotu, ‘ofisa kolo, Pule Fakvahe moe ni’ihi kehe tokolahi kemou fa’ahi? Mo’oni koā Kapineti ‘oku mou poupou’i mo faisoo’i  ‘ae ngaahi  nusipepa  ‘e ni’ihi kenau fehangahangai moe Kele’a? Fēfē moe TV OBN? ‘Oku mou loto pe koā Kapineti ke mavaeua  mo fakafa’afa’ahi  ‘ae fonua? Tuku ‘ae mo’ui ‘AFUNGÍ, ‘oua temou toe foua ‘ae hala  na’e fou ai ‘ae māmaní.

4. Langa ‘Emipaea (IMPERIALISM). Me’apango he’ikai lava ‘e hotau ivi faka’ekonōmiká moe ivi fakakautau ketau puke fakamālohi mai ‘aki ha konga fonua. Ka ‘oku fotunga kehe Kapineti ho’omou langa ‘Emipaea ‘i hotau ki’i fonuá, kuo mou vahe tu’unga ‘ihe ‘etau ki’i ‘ekonōmiká fakataha pea mo Falelahi (Ha’a Moheofo) kae tau to’e vavale si’i kau masivá, ‘ae tokolahi ‘oe kakai ‘oe fonuá, ‘i ho’omou  founga Tanaki pa’anga (Tukuhau) mamafá.

Fakahoa ‘ae ‘ū founga ‘e 4 ‘i ‘olungá, Kapineti pea moe ‘ū founga ‘oku mou tataki ‘aki ‘a Tongá. Kapau leva ‘oku nau tatau 100% pea mou ‘ofa mai ā kamou fakafisi leva ‘ihe kei faingamālie ‘ae fonuá, na’a mou feholaki  kiha ngaahi fonua muli kae inumia  ‘ehe kakai ‘oe fonuá ‘ae kona ‘a ho’omou ‘ū foungá. Fakafisi kae fokotu’u ha Pule’anga  Fakataimi. ‘Oku tau ‘osi fe’ilongaki pe ‘ihe anga ‘etau nofó talu mei tuai pea ‘oku mau kei lolongo pe ‘o sio meihe niuvākaí pea mālō eni kuo tau ako mo lotu, pea oku ngali saiange ‘emau lotu meihe Loló. Koehā hono ‘uhinga? He ‘oku kei fakatatali atu ‘a Siope Soakai, Kakahu, Fangupo, Kaianuanu, Kisikisi, Maka To’a, Makapapa  na’e toutou talanoa kiai ‘ae tohinoa ‘a Tokiukameá (Mariner), pea moe kau helo ‘o Pouono meihe fu’u ‘ovava ko tauhi kiaí moe matapā ko lotu mo’oní.

- mei he Kele'a