October 17, 2007                                        News You Can Trust!!                                      Volume 7

Fakafisi na’a hoko ha me’a!

Fokotu’u atu PSA Fakafisi kotoa PSC

Kuo ‘oatu ‘ehe Palesiteni Le’ole’o ‘oe PSA pe kautaha ‘ae kau ngāue fakapule’angá, Vili Vete, ha fokotu’u fefeka kihe Sea ‘oe PSC ‘aia ‘oku ne pule’i ‘ae kau ngāue fakapule’angá, Mishka Tu’ifua, kene fakafisi leva mei hono lakangá fakataha moe ongo ki’i mēmipa kehe ‘ihe komisioná, ‘a Tai’atu ‘Ata’ata mo Ross Chapman. Koe fokotu’u ko ení na’e tufa atu ‘iha tohi ‘ihe ‘aho Falaite kuo ‘osí kihe kau komisiona ‘oe PSC ‘ae Pule’angá pea ‘ave foki ‘ae tatau kihe Palēmiá, Feleti Sevele.

Koe tefito’i ‘uhinga kihe fokotu’u meihe PSA koe ‘ikai ke tau’atāina ‘ae PSC meihe mafi ‘oe Palēmiá, lolotonga koiá ‘oku ‘iai ‘ae ngaahi fakakikihi fefeka ‘ihe vaha’a ‘oe PSA ‘ae kau ngāue fakapule’angá mo honau kau Taki ‘ihe Kapinetí pea na’e totonu ke tu’u tau’atāina ai ‘ae PSC ‘o fai ha fale’i moha tataki.

Fakatatau kihe tohi ‘a Vili Veté, na’e fili mai ‘ae kau mēmipa ‘oe PSC mei tu’a meihe sekitoa fakataautahá kenau tau’atāina meihe pule filifilimānako ‘ae Kapinetí, hangē ko hono to’o mai ‘a Mishka Tu’ifua koe Pule Lahi ‘oe Pangikē Wespac Bank of Tonga ke Sea ‘ihe PSC pea fili atu leva ‘a Tai’atu ‘Ata’ata meihe TCC pea mo Ross Chapman meihe OE, Pacific Hardware moe Dateline Shipping kena mēmipa. Koe sino eni ‘oku pule kihe fakahūmai moe tuli atu, mālōlō livi, fakahikihiki moe penisoni ‘ae kau ngāue fakapule’angá moe ngaahi me’a kehe pē.

Fakatatau kihe tohi meihe PSA ka ‘ikai fakafisi ‘ae kau mēmipa ko ení ‘ihe ‘aho 31 ‘o Sune ní ‘e hanga leva ‘ehe PSA ‘o poikoti ‘ae ngaahi pisinisi ‘ae toko tolu ‘oku hā ‘i ‘olungá pea ‘e a’u aipē kiha fa’ahinga tafihu fakatokolahi hangē koe tukungāue ka koe fili faka’osi ia tenau faí. Koe ngaahi tukuaki’i leva eni kihe ‘ikai tau’atāina ‘ae PSC.

1. ‘Ihe kamata’anga ‘oe ta’u kuo ‘osí na’e hanga ai ‘ehe Pule’angá ‘o tutu’u ‘ae ngaahi monū’ia kehe ‘ae kau ngāue fakapule’angá hangē koe hikihiki vāhenga fakata’ú, le’ole’o moe fakahiki lakangá. Ka na’e kei fakahoko pe eni ia kihe kau Polisí moe kau Sōtiá pea ‘oku tui fakapapau ‘ae PSA ‘oku maumau ai ‘ae MOU na’e fakamo’oni kiai ‘ae kau tukungāué moe Pule’angá. ‘Oku teu fai heni ‘ae hopo koe’uhí koe MOU ‘oku fakahā ai ‘e ‘ikai fai ha filifilimānako kihe kakai na’e kau ‘ihe tukungāué pea ko hono mo’oní koe Polisí pē moe Sōtiá na’e ‘ikai ke kau ‘ihe tukungāué pea ko kinaua pē na’e tali kena ma’u ‘ae ngaahi monū’ia ‘i ‘olungá. Koe poiní na’e ‘ikai ke tu’u ‘atā ‘ae PSC kene taukapo’i kotoa ‘ae kau ngāué kae ‘alu kuikui aipē ia ‘ihe me’a na’e fokotu’utu’u ange ‘ehe Palēmiá – ‘ae tama na’á ne fili ‘ae kau PSC.
2. Tupu meihe ‘ai’ainoa’ia ‘ae PSC na’a nau tukuange tavale ‘ae kau ngāue fakapule’angá ‘ihe polokalama fakatokosi’i ‘ae Palēmiá kae ‘ikai ke sivisivi’i ‘ae ngaahi lakanga na’e ‘ai ke tukuangé. Ko hono iku’angá koe mole ai ‘ae kau faiako na’e fu’u fiema’ú ‘o uesia ai ‘ae sivi ‘ihe ta’u kuo ‘osí. Fakatatau kihe Tohi meihe PSA na’e ‘osi fakahā ‘ehe Talēkita Akó ‘ihe ta’u kuo ‘osí ki mu’a pe ‘ihe fakatokosi’í ‘oku ‘osi nounou pē ‘ae kau Faiakó ia ‘aki ‘ae toko 150 hili pe ia hono ‘oatu ‘ae Tohi Fakaafe meihe PSC ke kau ‘ae kau faiakó ‘ihe fakatokosi’í. Kae kei hanga atu pē ‘ae PSC ‘o kinisi hifo ‘ae kau faiakó ‘aki ‘ae toko 300 neongo ‘ae tautapa meihe FITA ke ‘oua he ‘e uesia ai ‘ae sivi ‘ae fānau akó. Ko hono iku’angá koe faiako ‘e 3 kihe ‘apiako ‘e 1 moe kalasi lēvolo kehekehe ‘e 6. Koe faingata’a eni na’e fakahā ‘ehe CEO fo’ou ‘oe Akó, Viliami Fukofuka. Koe uesia ‘ae fānau ako Tongá, fakatatau kihe tohi meihe PSA, ‘oku totonu ke hilifaki ia kihe PSC. Pea ‘oku fakamamahi eni he ‘oku ‘iai ‘ae kau muli ‘ihe PSC.
3. ‘I Fepueli ta’u kuo ‘osí na’e tuli fakataimi ta’evahe ai ‘ae Sekelitali Seniale ‘ae PSA, Mele ‘Amanaki, ‘ihe uike ‘e 11 ‘o uesia fakapa’anga ai ‘ae tokotahá ni mo hono ongoongó. Na’e tupu eni meihe ‘ene ngāue’aki ‘ae email ‘ae Pule’angá kihe kau mēmipa ‘oe PSA. Koe email koiá fakatatau kihe tohi ‘a Vili Veté koe totonu ia ‘ae Sekelitalí ke lea fakatatau kihe kupu 7 ‘oe Konisitūtoné. ‘Ikai ngata aí ka na’e toe lea fefeka foki moe Fale’i Fakalao ‘ihe ‘aho koeé, ‘Alisi Taumoepeau, ‘o uki ‘ae kau ngāue fakapule’angá ke hokohoko atu ‘ae tukungāué. Ka na’e ‘ikai tuli fakataimi ia ‘ihe ngāué pea kuo hoko ia koe Minisitā ‘ihe ‘ahó ni. ‘Ikai ngata hení ka na’e hoko ‘ae ta’evahe ‘a Mele ‘Amanakí ke bounce ai ‘ene ngaahi sieke meihe ‘ene ‘akauni ‘ihe Pangikē Westpac Bank of Tonga. Pea toe ‘iai moe mo’ua ‘ihe ‘ene ‘akauni pangikeé ofi kihe $230.00 koe ngaahi totongi tupu moe fī kehe ‘ae Pangikeé. Hili koiá koe ngaahi palopalema eni na’e hoko ‘ihe fietonu ‘ae Sea ‘ihe PSC kihe Palēmiá ‘aia na’á ne fili ia ke Sea ‘ihe PSC pea koe toe tokotaha tatau pē ‘oku Pule Lahi ‘ihe Pangikē Wespac Bank of Tonga. Kuo uesia ‘ae kau kasitomā ‘ae Pangikeé ‘ihe tauhi vā ‘ae Pulé kihe Palēmiá.
4. ‘Ihe feinga fakamuimui ‘ae PSA ke fakalōlōa ‘ae MOU mo fakakakato ‘ae ngaahi fiema’u kehe ‘ihe MOU ‘ihe vaha’a ‘oe Pule’angá moe kau ngāué  na’e ‘ilo lelei pē ‘ehe PSC na’e ‘ikai kenau kau ‘ihe fakamo’oni kihe MOU. Koia ai na’e totonu kenau tu’u ‘atā ‘ihe fakakikihi’ae PSA moe Kapinetí ‘o feinga ke ‘oua ‘e hoko ha kē pe tukungāue, ka ‘oku kau pē PSC ia moe Kapinetí. Kuo hoko pe PSC koe ki’i tamapua ‘ae Palēmiá he koe Palēmiá pe ia na’á ne fili ‘ae kau mēmipa ‘oe PSC. Koia ai ‘oku ‘ikai tau’atāina ‘ae PSC pea ‘oku hoko ‘enau mo’ui fakaongoongó ke melemo hifo ai ‘ae totonu ‘ae kau ngāue fakapule’angá ‘o taau ai kenau lue kotoa ki ‘api.

Na’e ‘ave ‘ae nusipepá ni ‘o paaki ‘oku te’eki mahino ha tali meihe Pule’angá.

- mei he Kele'a