October 17, 2007                                        News You Can Trust!!                                      Volume 7

Kolomu Ha'alofonua...

Koehā ‘oku ta’emali ai ‘ae Tu’i?

Koe taha eni ‘ae ngaahi fifili hotau kuongá pe koehā ‘oku ‘ikai ke mali ai hotau Tu’i? Ko Tupou I na’e ‘iai hono mali, pea ‘oku taku ia koe Tufunga ‘o Tonga ‘i Onopooní. Tupou II na’e mali pea neongo hono lau ia koe tama na’e manako kihe ngaahi me’a fakamatelié ka ne ‘iai ‘ene fānau. Ko Tupou III na’e mali pea na’á ku lau ia koe Kuini ‘Ofeina ‘o Tonga pea ‘iloa foki ‘i māmani. Ko Tupou IV na’e mali pea koia na’á ne ‘uluaki ongo’i ‘ae peau tā ‘oe liliu fakatemokālatí. ‘Oku lahi hono tukuaki’i ia kihe ngaahi nunu’a kovi ‘oe ‘aho ní he koia pē na’á ne mei fakatafoki ‘a Tonga ka na’e ‘ikai kene fai pehē. Ko Tupou V eni, ‘ae fuofua Tu’i ‘o Tonga ‘oku ‘ikai mali ia. Pea kuo ta’u motu’a ‘o hangehangē he’ikai pe toe mali ia.

Koehā nai hono ‘uhinga? Na’e ‘ikai nai kene tali ha taha na’e finangalo kiai ‘a Tupou IV lolotonga ‘ene kei mo’ui? ‘E fu’u tōmui nai ke toe mali ia ‘ihe taimi ni? Pe ‘oku ‘ikai pe ke toe fie mali ia?

‘Oku ‘iai ‘ae lau ‘oku pehē, “‘Ihe tu’a ‘oe kakai tangata lavame’á ‘e tu’u ai ‘ae fefine.” (Behind every successful man is a woman.) Koe me’a te tau ala fakafuofua meihe lau ko ení ‘e pehé ni. Koe ngaahi uaifí ‘oku nau hoko koe kau tokoni ofi kihe husepanití. Koe uaifí ‘oku ne poupou mo hoko koe fakakakato. Pea ka ‘ikai ha uaifi ‘e lava ke hangē ‘ae tangata koiá ha pōpao ta’e hamá. ‘Io, ‘o fakatafa!

‘Oku fai ‘ae tokanga ki heni he kapau te tau vakai ofi kihe kakai ‘oku lalafi ‘ihe lalo takafalu ‘o Tupou V te tau ‘ilo ‘e kau ai ‘ae kau tangata ko ení; Soane Manilala, Sefo Manilala, Feleti Sevele, Paul Karalus, pea kuo ‘unu atu eni mo Kalafi Moala mo hai fua. Ka koe poiní koe fu’u kakai pisinisi eni ia. ‘Ikai ha uaifi ke fanafana manava’ofa he ‘e kehe pe ia meihe sio ‘ae tangatá. ‘Oku fa’a manava’ofa ange ‘ae kakai fefiné he ko kinautolu ‘oku nau fā’ele’i mai kitautolu ki māmaní. Ko kinautolu ‘oku nau ‘uluaki ongo’i ‘ae ‘ofa kihe manava fo’ou na’e toki fanau’í moe totonu ke malu’i ia ke mo’ui hake. Koe fo’i tafa’aki mahu’inga ia ‘oku pulia meihe Tu’i ko ení.

Kohai ia ‘e ta’etui kihe lau ‘oku ou fai atu? Na’a mou sio kihe hā’elea ‘ehe Pilinisesi Pulé ‘a Panga Si’i lolotonga ‘ae tuku ngāue? Na’a mou fanongo kihe ‘ene folofola? Na’á ne pehē na’á ne fakahā kihe Palēmiá moe kau Minisitā ‘oe Fakataha Tokoní, ka ‘osi leva ‘ae ‘ū fakakaukau leleí (pea ne tuhu ki hono langí), pea tau ngāue’aki leva ‘ae me’a koeé (pea tuhu ki hono mafú)! ‘Oku mou vakai kihe manava’ofa ‘a fefiné – ‘a fa’ē? Pea ne taki hifo ‘ae fu’u kau Minisitaá kenau me’a lalo ‘ihe pelepelá ki Panga Si’i? Koe fotu ia ‘a fa’eé! Koe fotu ia ‘a manava’ofá!

‘Oku ‘iai ‘ae tui na’e mei lelei ange ‘ae fakahoko fatongia ‘a Tupou V kapau na’e ‘iai hano mali ke tu’u mei hono tu’á. Pea ke ‘iai foki mo ha’ane fānau. He ‘e tokoni ia ke to’o atu ‘ae me’a ‘oku tau ui koe “manava’i pa’a.”

Ko ‘ene ta’emalí kuo tu’u lavea-ngofua ai ia kihe fakakaungātamaikí moe mo’ui fakamatelié. Na’e toki pavaki mai ‘ae ongoongo ‘ihe Kele’á ‘o pehē ‘oku ‘iai ‘ae lau ‘ihe Siasi Uesilianá ke to’o ‘ae lakanga fakanofo ‘oe Palesitení meihe Tu’í he ‘oku lahi ‘ene ma’u uainé moe kava mālohí.

Koe konga pē ia ‘ae ola ‘ene ta’emalí. ‘Oku hanga atu leva ‘ae ngaahi fale’i moe fakavilivili ‘ae ngaahi kaungāme’a ‘ae Tu’í ‘o fepaleaki ‘ae Tu’í ta’e ‘iai ha taha ofi ‘aupito (immediate) kene tokoni ke toe sivi’i mo toe siofi ‘ae ngaahi lau ko ení na’a kovi kihe Tu’í. Koe me’a ‘e hoko aí koe fale’i pe ‘ae kau fale’í ke ma’u ai ha’anau lelei fakafo’ituitui hangē koia kuo tukuaki’i kihe ongo tautehina Manilalá. Koe ni’ihi ia ‘oku toitoi ‘ihe tu’a ‘oe Tu’í.

Makehe meihe ngaahi me’á ni ‘oku kamata ke ‘asi mai ‘ae ngaahi ‘ulungaanga faikehe ia mei hotau Tu’í. Hangē koe ha’u ‘ae kakaí kihe mali ‘a Kiu mo Fane Tupou Vava’u Tu’ivakanoó mo honau ngaahi hoá kae hā’ele atu ‘ae Tu’í ia mo ‘ene ki’i kulī. ‘Oku fu’u fo’ou ia ki hotau kakaí he ‘oku hōhoa tamaki ia moe Tu’i na’e toki halá, Tupou IV. Na’a tau sio ‘anefē na’e fua holo ‘e Tupou IV ha’ane kulī lolotonga ha kātoanga pehē? Pea ‘ave ‘ehe Sōtiá ‘ae kulī ‘a Tupou V pea muimui atu ia ke fakafoki mai ‘o pehē ‘ehe kau Polisí ko ‘ene liuakí ia pea nau ifi ‘enautolu ‘ae fasi fakafonuá. ‘Oku tau anga ‘ia Tupou IV ‘ae mahino ‘ae taimi ‘e liuaki aí. Pea neongo hono tukuaki’í ka na’á ne lava ‘o fakaafe’i ‘ae faka’apa’apa ‘ae ni’ihi koe’uhí ko hono natulá.

Kapau tetau pehē na’e ta’efie mali ‘ae Tu’í koe’uhí na’e ‘ikai ke tui ia kihe ‘etau founga fakatonga koe mali fāmili ‘ae Fale ‘oe Tu’í, hangē nai koe mali ‘ae Pilinisi Kalauni ‘oe ‘aho ní mo Nanasí he koe mali fāmili ‘aupito ia. Kapau koia pea koe taimi totonu eni ke fakalelei’i ai ‘ehe Tu’í ‘ae lao koiá ke tapu ‘ae mali fāmili ‘ae Fale ‘oe Tu’í. He koe tu’utu’uni ia ‘ae Konisitūtoné ke tatau pe ‘ae laó kihe kakai kotoa ‘o Tonga kae ‘ikai ke kehe kihe hou’eikí pea kehe kihe kakaí. Kapau na’a koha mali fāmili ia ‘aha kakai tu’a kuo nau ‘osi tu’u ‘ihe puhá ‘o fakamatala.

Kapau aipē ‘e ‘ikai fakatonutonu ‘ae laó ia pea ‘e pehē leva ‘ehe kakaí, “‘Oō tā ‘oku ‘ikai koe ‘uhingá ia.” Pea ‘e hoko atu leva ‘enau fifilí ka koe toe hā koā na’e ‘ikai mali ai? Kapau te tau pehē koe me’a pē ia ‘ae Tu’í. ‘Io, ka koe’uhí ko ‘ene ma’u ‘ae mafai fakaleveleva ke faitu’utu’uni ki Tonga kotoá ‘oku ‘iai ‘ae hoha’a ki hono ‘ātakaí he koe ‘ātakai ia tene tohoaki’i mo fakafōtunga ‘ene faitu’utu’uni ‘e faí – ‘o tafe atu kihe lotofale kotoa ‘o uesia ai ‘ae kakaí.

‘Oku lolotonga tukuaki’i ‘ae Tu’í kihe lahi ‘ene fakatamaiki moe kakai pisinisí ‘o ‘ikai ha’ane tokanga ‘e taha pe ‘e uesia fēfē ai ‘ae fonuá. Koe poiní ia. Pea kapau na’e mali mahalo na’e fuoloa hano pakepake’i mai ‘e hono malí ‘ae fu’u kau fale’i hala mo siokitá ‘ihe fa’a ō atu ‘o fale’i hala hono hoá. Koe poiní ia. Ko ‘ene nofo tokotahá ‘oku toki tu’u ‘atā ia ai kihe ‘oho ta’etuku hono kaungāme’a fakapisinisí ‘o vele’i mo vili’i ia kihe ngaahi me’a fakapisinisi ‘ihe fonuá ‘o lahi ai hono tukuaki’í. Koe poiní ia.

Pea kapau koe fili pe ia ‘ae Tu’í ke ‘oua ‘e mali pea toe fili pē ia ke fakakaungā tangata kihe kau pisinisi ko ení pea ‘e foki ‘ae tukuaki’í kiai mo ‘ene fili ‘oku faí. Koe’uhí ‘oku hanga ‘ehe ‘ene fili fakafo’ituituí ‘o uesia ‘ae kakaí. He koe tangata kotoapē ‘oku ‘iai ‘ene fiema’u fakafo’ituitui ke fakakakato. Ka koe lolotonga ‘ene ma’u ‘ae fu’u mafai fakalūkufua lahi pehē hono lakanga koe Tu’i, ‘e tu’u lavea ngofua ‘ae mafai koiá ki hono pa’usi’i kihe lelei ‘ae tokosi’í kae iku kavahia ai ‘ae tokolahí.

Na’a tau toki fakamanatua foki ‘ae Sāpate Tamaí pea ‘oku hangē ‘oku fakatutá ‘ae ‘ikai ke lava ‘o lau fakalelei ‘ae ouau koiá ki hotau Tu’í. Na’e toki ‘osi atu moe Sāpate fa’eé ‘oku ‘ikai ha taha ia ke fa’ē ki ha’ane fānau. Pea ‘oku hā ia ‘oku ‘ikai nōmolo ‘ae ‘ātakai fakafāmili ‘oe Tu’í. Koe fāmilí ‘oku hangē ngaahi va’a poupoú. Pea koe lahiange ‘ae ngafa ‘oku hili maí koe lahiange ia ‘ae poupou ‘e taau kete ma’u mei hoto fāmilí. Pea te tau pehē leva “Koe Fale ‘o Ha’a Moheofó ‘oku nau fai hotau ‘Unuaki’í.” Sai, koehā leva ha lea te tau fai kia Tupou V mo hono kaungātangata ‘oku nau fale’i mo tataki iá. Manatu ‘oku ‘ikai koha kakai eni na’e fili ‘ehe kakai ‘o Tongá kenau fale’i ‘a Tupou V. Koe ngaahi kaungāme’a pe ia ‘o Tupou V. Te tau pehē nai, “Ko Tupou V mo hono kaungā tangatá ‘oku nau ‘Unuaki ‘a Tonga?”

Tuku ‘ae ‘itá kae fakakaukau kihe poiní moe ngaahi mo’oni’i me’a ‘oku tuhu’i atú.

mei he Kele'a