October 17, 2007                                        News You Can Trust!!                                      Volume 7

Ongoongo mei he 'Ikale Tahi, Falanise - 26 Sepitema 2007

Ko e fakamo'oni autograph 'a Rev. Siaosi Kava, Sangster Saulala, kau folau mei Tonga mo e timi 'Ikale Tahi ki he kauleka mo e kakai Falanise.

Ko e kau fans 'o e 'Ikale Tahi.

Malo e Lelei

Fakamolemole pe he 'ikai ke toe vave ange hono update atu 'ae ongoongo, 'oku fu'u mo'umo'ua 'aupito he taimi ni. 'Ihe 'aho kotoa talu meihe 'osi 'ae tau mo 'Afilika, 'oku kamata pe 'ae a'u mai ia 'ae 'u media pongipongia 'aupito, pea koe 'u media ia 'e ni'ihi 'oku nau omai pe ki nautolu 'o mohe he Hotele. 'Oku fai pe leleitaha, pea neongo 'ene lahi e ngaue ka koe experience lelei 'aupito 'eni kihe tokotaha kotoa.

'Uluaki pe koe fanau 'eni 'oku nau mo'ui lelei 'aupito, kae'uma'a 'ae kau management. 'Oku fiefia lahi 'aupito pe 'ae fanau pea ko 'e nau teuteu 'oku lelei 'aupito, ka 'ihe taimi tatau 'oku fu'u 'ulungaanga fakatokilalo 'aupito 'ae Timi mo Focus 'ihe teu tau mo 'Ingilani. 'Oku lotolahi 'aupito 'ae fanau va'inga, pea 'oku nau mateuteu 'aupito ke nau fai honau tukuingata pea ke Ikuna foki.

'Ihe 'aho 'aneafi, hange koe pongipongi kotoa na'e pongipongi mai 'ae 'u media, TVs, Radios, Magazines, Websites moe 'u Newspaper koe feinga hanau faingamalie ke faka'eke'eke mo faitaa'i e fanau. Fakafuofua kihe kautaha TV 'e 8 fakakatoa, Radio 'e 20approx, pea moe Newspapers/Magazines 'e 30 approx. Na'e kamata 'aki pe 'ae 'u interview, faita moe puka appointment 'ihe Hotele kimu'a pea toki mavahe atu kihe mala'e va'inga kihe fakamalohisino. 'Ihe a'u atu kihe mala'e va'inga na'e 'osi tali mai ai 'ae 'u media ia 'e ni'ihi 'o kau ai e ngaahi kautaha faiongoongo 'iloa hange koe; TVNZ (2 group), TV 3 NZL (2 group), TV3 'a Falanise, TV24 'a Falanise etc. Na'e toe tokolahi foki moe 'u Newspaper moe Letio kae'uma'a 'u Makasini moe 'u Websites. 'Oku toe busy foki pea kiu moe telefoni 'ihe puka appointment, kae'uma'a e ngaahi interview kehekehe meihe 'u fonua kehekehe. 'Oku lahi foki e 'u TV moe Letio kuo nau kole pe 'e lava kenau muimui'i e fanau ke fa'u'aki e news moe short story fekau'aki moe timi 'a Tonga.

 Talu mei 'aneuhu e fetu'utaki mai meihe ngaahi media 'o puka e ngaahi interview moe fanau ke fakahoko 'ihe taimi te nau tu'uta ai 'i Palesi. 'Ihe efiafi 'aneafi na'e fakaafe'i ai 'ehe Mayor 'o Jacou mo hono kolo 'ae Firepower 'Ikaletahi, 'a ia na'e kamata'aki e ngaahi fakamo'oni autographs, faita moe fanau va'inga, pea toki fakahoko leva e ngaahi entertainment 'a ia na'e fai ai 'ehe 'Ikaletahi hono taa'i e Sipi Tau kimu'a pea toki fakahoko 'e foaki me'a'ofa moe Dinner 'ihe Hall. Na'e foaki ai 'ehe Mayor moe ki'i kakai 'o Jacou e falani kehekehe takitolu 'e tokotaha kotoa, takitaha e kepi, pea moe 'u me'a'ofa koe hina Uaine ke takitaha e fanau.  Na'e hoko atu ai pe kiha ngaahi hiva meihe kau ifi, Na'e mafana ai 'a Tali kavapalu 'one tu'u atu 'o ifi e me'aifi pea toe hoko atu 'o ta moe nafa pea toki faka'osi kihe Taki laka, 'a ia ko Nafe, 'one taki'i e fu'u laka 'o laka takai e fu'u kakai kotoa na'e kau ki ai. Na'e fai foki e fe-fakamalo'aki 'ae Pule moe Mayor 'oe kolo, pea na'a ne kole ai mo Talamonu kihe Timi 'ihe teuaki kihe tau 'oku teu fakahoko. Na'e kole ai 'ehe Mayor kihe Timi 'a Tonga kenau fakapapau'i tenau kaivevela'i 'ae timi 'a 'Inglani kae'uma'a e Timi 'a 'Aositelia 'ihe kuata fainolo, pea koe kakai kotoa 'o Falanise tenau poupou'i e timi 'ae 'Ikaletahi peseti 200% 'aki e teunga kulokula 'ae kolo kae'uma'a e toko 60 miliona, kakai 'o Falanise.Na'e fiefia lahi e kakai mo nau fakamalo kihe timi he 'enau fili 'a Clapiers, Jacou, Montpellier ke nau nofo ai. Na'a ne toe fakamalo'ia foki moe anga fakakaume'a , faka-faingofua mo fakatokilalo 'ihe taimi kotoa.

'Ihe pongipongi hake pe 'aho ni na'e fakatu'uta he Hotele 'ae ngaahi kautaha media ke faka'eke'eke mo faitaa'i e fanau va'inga kimu'a e fakamalohisno. Koe meimei peseti 'e 60 'oe kau faiongoongo koe 'enau feinga mai ke fetaulaki mo faka'eke'eke 'a Finau Maka. 'Ihe a
'u atu 'ae timi kihe mala'e va'inga kuo 'osi tali mai moe 'u media kehe koe tali e Timi. Na'e fakahoko lelei pe 'enau fakamalohisino neongo e toko lahi e 'u media. 'Ihe hili e ma'u me'a tokoni ho'ata, na'e 'alu 'ae fanau ki lotokolo ke fakahoko ai ha faita, pea mo 'ave ha ni'ihi kihe Team Announcement (Press Conference). Koe ni'ihi na'e kau kihe Press Conference ko Quddus Fielea, Ellis Meachen, Nili Latu, 'Inoke Afeaki, Finau Maka, Viliami Vaki, Pierre pea mo Tevita Tu'ifua. Na'e faka'ofo'ofa 'aupito 'ae tali fehu'i 'ae kau tangata pea na'e fiefia lahi 'aupito 'ae kau faiongoongo 'ihe Conference. 'Ihe efiafi hifo na'e fakahoko leva 'ae Lotu famili 'ae timi, pea na'e kau mai ki heni 'ae Mayor 'oe kolo moha ni'ihi 'o 'ene kau ngaue moha ni'ihi kehe pe. 'Ihe hili 'ae lotu famili na'e foaki 'ehe mayor mo 'ene kau muimui ha ngaahi me'a'ofa ma'ae fanau moe kau 'ofisiale mo 'ene talamonu kihe fanau 'ihe teu va'inga 'oku fakahoko. Koe me'a faka'ohovale kihe Timi ko hono tufa atu e ngaahi hina uaine kihe tokotaha kotoa, koe hina uaine 'oku fakahingoa koe Clapiers mo Tonga. Na'e fiefia lahi 'ae fanau 'ihe ngaahi me'a'ofa, pea na'e faka'osi 'aki e fakamo'oni autographs, faita pea fakamavae ai pe moe ki'i kolo. Na'e kamata ai pe 'ae fakama'opo'opo e 'u me'a 'ae fanau, pea 'ave atu e konga 'oe 'u uta ki Palesi he pooni, pea koe toenga 'e toki 'alu atu ia moe fanau pongipongia 'apongipongi.

'Ihe tu'u he taimi ni 'oku fu'u ma'olunga 'aupito 'ae tu'unga'oku 'i ai 'a Tonga, 'a ia ko 'ene tu'u he taimi ni 'oku pehe 'ehe ngaahi kautaha ongoongo ko Tonga 'ae Top Team 'oe Fe'auhi he taimi ni, pea ko Finau Maka 'ae tangata va'inga 'oku STANDOUT taha ia 'oe fe'auhi 'ihe taimi ni. Na'e faka'ohovale foki kihe kakai ko 'enau toki 'ilo ko Finau 'oku ta'u 30, pea ko 'ene toki fuofua tau 'eni ma ha'a fonua(fuofua tau ma'a Tonga). 'Ihe feitu'u lahi 'i Falanise, kuo tui holo 'ehe kakai e 'ulu loi 'oku tatau moe 'ulu 'o Finau, pea 'oku 'ihe feitu'u kotoa  pe 'ae fuka Tonga.

Kataki koe Timi 'ena kihe teu tau mo 'Ingilani 'oku attached atu.

'Oku 'oatu 'ae fakamalo 'ae Firepower 'Ikaletahi kihe kakai kotoa e fonua Lotu 'oku mou fai moe poupou ta'efa'alaua 'oku mou fakahoko ma'ae Firepower 'Ikaletahi. 'OKu toe 'oatu 'ae kole 'ae Timi Firepower 'Ikaletahi kihe kakai kotoa 'oe fonua ke 'oua na'a ngalo homou Timi 'Ikaletahi 'i homou ngaahi LOTU

'Ofa lahi atu moe Hufaki

Firepower 'Ikaletahi