October 17, 2007                                        News You Can Trust!!                                      Volume 7

Tokoni lahi e lotu ki he 'Ikale Tahi

'Oku kau he fakapulipuli 'a e va'inga 'a e 'Ikale Tahi ko e lotua he kakai Tonga 'a e timi mei he feitu'u kehekehe 'o mamani. Pea ne fakamalo'ia ai 'e he kapiteni, 'Otenili Latu 'a e 'Otua he ikuna, moe kakai Tonga 'i he'enau lotu 'i he 'osi 'a e ongo feinga tau mo 'Amelika mo Ha'amoa na'a tau ikuna ai.

Ko e mea fo'ou 'e taha he timi 'Ikale Tahi ko 'eni ko 'enau folau moe faifekau 'a ia ko Rev. Siaosi Pita Kava. Pea 'oku fai ma'u pe 'a e lotu e timi he efiafi kotoa moe faifekau; pea 'oku ongo'i pe 'e he kau 'ofisiale moe kau va'inga 'ae tokoni 'ae ivi 'oe lotu.

'I he tau mo Ha'amoa, ne fakaha 'e he faiako, Kutusi Fielea 'i he ngaahi mitia 'a mamani, 'oku nau ongo'i 'a 'enau tau he Sapate koe'uhi ko e 'aho tapu ia 'i honau fonua, ka te nau tau ma'a Kalaisi.. Pea 'i he 'osi 'a e ikuna ne mapelu kotoa pe fanau 'i mala'e 'o fakamalo'ia 'ae 'Otua mo foaki kiai 'a e langilangi.

Pea ko e taha ia makehe'anga 'o e timi ko 'eni ko e lotua he kakai pea moe feinga 'ae timi ke fakalangilangi'i 'ae 'Eiki 'i he'enau va'inga.

Fakatatau ki he lau 'ae sea oe poate, Sangster Saulala kuo nau fai honau leleitaha 'i he teuteu'i 'ae timi ko 'eni. Pea 'oku ne tui ko e timi leleitaha 'eni kuo tanaki 'e Tonga moe head coach moe kau ofisiale leleitaha ne ha'u moe timi. Pea na'e feinga'i mai moe faifekau ke tokoni fakalaumalie ki he fanau pea ko e faka'osi pe feinga, ko e kole ki he kakai Tonga kenau hufia 'ae timi. Pea 'oku ne faka'amu ka 'iai ha ikuna, pea foaki 'a e langilangi koia ma'ae 'Eiki.