October 17, 2007                                        News You Can Trust!!                                      Volume 7

Tonu nai kau siasi ‘ihe Politikale?

‘Oku tonu nai ke kau ‘ae Siasí ‘ihe ngaahi me’a fakapolitikale? Fakatatau kihe ‘Epikopō kuo pekiá, Pātelesio Finau, ‘io, ‘oku tonu ia. Pea ko ‘ene lau eni na’e paaki ‘ihe Taumu’a Leleí ‘i Sune 1990.

  Koe kau Palōfitá na’a nau fu’u fakakikihi honau ngaahi ‘ahó. Na’a nau fa’a fakaanga’i ‘ae founga fulikivanu na’e fakamālohi’i ‘aki ‘ae kakaí kenau nofo ai ‘o tatau pē ‘ihe Siasí moe Sōsaietí. Koe Palōfitá koe matāpule lea ‘ikai koha taha talamonū kihe kaha’ú. Koe tokotaha ‘oku fakafofonga’i ‘ehe kau Palōfitá koe ‘Otuá.

‘Oku ‘ikai taukapo ‘ae kau Palōfita ‘oku nau mā’oni’oni ange ‘ihe kakai kehé. Koe anga mahení koe kakai lavelavea pe kinautolu, kae hangē koia ko Selemaia mo ‘Aiseá, na’a nau ‘ave ‘enau tōnounoú kihe ‘Eikí.  

Na’e ‘ikai manakoa ‘ae kau palōfitá ‘ihe kakai koloa’ia mo ma’u mafaí, koe’uhí pe ko ‘enau ‘eke’i ‘ae fakamaau totonú meiate kinautolu mo valoki’i ‘enau faihalá. ‘Oku ‘ikai hāmai ha Palōfita ia na’e fili ke Palōfita. He na’a nau ‘ilo ‘e lahi ai honau filí, pea ‘e fakatanga’i kinautolu pea taimi lahi ‘e fakapoongi. Ka na’e fili kinautolu ‘ehe ‘Eikí pea fakalotolahi’i kenau tuhu’i ‘ae tō’onga ngāue hala kotoapē pea ke lea ‘aki ‘ae finangalo ‘oe ‘Otuá ‘i māmani pea kihe mafai kotoapē.  

Sēsū koe Palōfita

Koe Palōfitá koe faiako ‘ae ‘Eikí, koe faiako ma’ae totonú moe mo’oní. Koe faiako pe Palōfita fisifisimu’a tahá ko Sēsū Kilisitō. Na’e makehe ‘ene faiakó he na’á ne fakahinohino ‘o hangē tofu pe koia ‘oku ne ma’u ‘ae mafaí, ‘o ‘ikai hangē koe kau sikalaipe kehé (Mt 7: 28, 29.) Pea ‘oku ‘ilo ‘ehe taha kotoa na’e foaki ‘e Sēsū ‘ene misiona fakafaiako koení kihe kau ‘Aposetoló moe Siasí.

“Koe mafai kotoa ‘i hēvani mo māmani, kuo foaki ia kiate au. Koia ai mou ō ki       māmani ‘o ngaohi ‘ae ngaahi fonuá ko ‘eku kau tisaipale, papitaiso kinautolu… pea ako’i kinautolu kenau tauhi ‘ae ngaahi fekau kuou ‘oatú. Pea kemou ‘ilo teu ‘iate kimoutolu ma’u aipē: ‘io kihe ngata’anga ‘o taimí.” (Mt 28: 18-20).

Koe kau Palōfita koia ‘o ‘Isilelí koe ki’i kulupu tokosi’i pe ia na’a nau ma’u ‘ae tāpuaki makehe, ka koe kakai kotoa na’e papitaiso ‘ia Kilisitoó ‘ihe fuakava fo’oú, ‘oku nau vahevahe ‘i hono ngafa fakafaiakó mo faka-Palōfitá.

‘Ihe Siasi Katoliká, koe kau ‘Epikopoó ‘ae kau faiako faka’ōfisialé. ‘Oku sio taha kiate kinautolu ‘ae kakai tuí kiha tataki moe fakahinohino pau ‘ihe ngaahi me’a kau kihe tuí moe mōlalé. Pea ‘oku mohu ‘ae Siasí ‘ihe taukei meihe ta’u ‘e 2000 kuohilí ‘ihe fakahinohino ‘ae ngaahi kōsilió, Tu’itapú, kau takimu’a ‘ihe Siasí moe Tohitapú ‘aē koe tohi ngāue ‘ae Siasí.  

Taukave’i Siasí ‘ae Fakamaau Totonú

‘Oku tau fanongo ma’u pe ‘ihe lau ‘o pehē ‘oku ‘ikai totonu ke fiekau ‘ae Siasí ‘ihe politikalé. ‘Oku ‘ikai totonu ke kau ‘ae Siasí ia kiha kulupu pe paati fakapolitikale ka kuopau ke tu’u ia ma’ae fakamaau totonú pea kenau valoki’i ‘ae ta’efakamaau totonú.

‘Oku ‘iai ‘ae ni’ihi ‘oku nau faka’amu ke fakangatangata ‘ae kau Faifekaú kihe malanga fakahēvaní mo fakalaumālie ‘ata’atā pe. Ka na’e ‘ikai ‘aupito ke pehē ‘ae kau Palōfitá ia. Na’e ‘ikai faingofua kia ‘Emosi kene malanga’aki eni meihe ‘Eikí kihe kau Faifekaú moe kau ma’u lotu hono taimí:

“‘Oiauē ‘a kimoutolu ‘oku mou fakatauange ke hoko mai ‘ae ‘aho ‘oe ‘Eikí! ‘Oku ou fehi’a mo palakū’ia ho’omou ngaahi kātoangá; ‘Oku ‘ikai teu tali ho’omou ngaahi fakatahá; Neongo ho’omou ‘ohake kiate au ha ngaahi feilaulau mōifua; Moe ngaahi feilaulau me’akai, ‘e ‘ikai teu tali; Pea ‘e ‘ikai teu hanga ki ho’omou feilaulau ‘ofá neongo koe fanga pulu sisino; Hiki meiate au ‘ae longoa’a ho’omou hivá; ‘Oku ‘ikai teu toe fie fanongo kihe le’o ho’omou ngaahi hele filó; Kae tukuange ‘ae fakamaau totonú ke tafe hangē ha vaitafé; Moe faitotonu hangē ha vaitafe ta’engatá.” (‘Emosi 5: 18, 21-24)

Ngafa fakapalofita ‘oe siasi

Hangē koe kau Palōfita ‘i mu’a aí na’e anga fakatōkilalo ‘aupito ‘ae ‘Eikí. Pea ‘oku ne fekau kitautolu ki māmani ketau liliu ‘ae kakaí. Ko ‘ene misiona fakafaiakó, ‘oku kamata’aki ‘ae:

“Ke ‘ave ‘ae ongoongo leleí kihe kau masivá,

Ke talaki ‘ae tau’atāiná kihe kakai pōpulá,

Ke faka’aaki ‘ae kuí,

Ke faka’atā ‘ae kau mafasiá,

Ke talaki ‘ae ta’u ‘oe hōifua ‘ae ‘Eikí.” (Luke 4:18)

Koe misiona ‘ae Siasí ko hono talaki mo fakafōtunga ‘ae kakaí; ke faka’aaki honau matá pea ke fakatau’atāina’i kinautolu mei honau fakapōpulá. ‘Ihe taimi ‘e ni’ihi koe’uhí koe fakahoko faka-Palōfita ‘ehe Siasí hono ngafá ‘oku fakatanga’i ai ia, pea talu ai ‘ene hoko koe “Siasi Ngūngūtapu Tapu Lea.”

‘Ihe taimi ‘e ni’ihi ‘oku hoko ‘ae Siasí ‘o fu’u fakamātelie pea ‘oku me’angāue’aki ia ‘ehe kakai koloa’iá moe ni’ihi ‘oku nau pukenimā ‘ae mafai fakapolitikalé ‘o ‘ikai toe lava ia ‘o lea kihe fakamaau totonú. Taimi ‘e ni’ihi ‘oku ilifia ‘ae Siasí ke ngāue faka-Palōfita koe’uhí pe ‘oku ne ‘ilo ‘ae me’a ‘oku fa’a hoko kihe kau Palōfita kimu’á. Pea ‘iha Sōsaieti fōpukupuku, ‘oku fa’a manavasi’i ‘ae Siasí ke ‘asi kuo tō kehe. Pea ‘oku lavaki’i ai heni ‘a Sēsū. ‘E hoko fēfē mai ai hono Pule’anga?    

  Kau Kalisitiane Fakahēvani

‘Oku ou tui ‘oku tokolahi ‘ae kau kalisitiane fakahēvani ‘i Tongá, kae tokosi’i ‘ae kau kalisitiane ‘oku nau tokanga kihe ngaahi mo’oni’i me’a ‘oku hokó moe fakamaau totonú. ‘Oku ‘ikai keu ofo, hono hanga ‘e Karl Marx, koe tamai ‘oe Kominiusí, ‘o fakamatala’i ‘ae Siasi hono ‘ahó koe faito’o konatapu pē ia ma’ae kakaí.

‘Oku le’o melie ‘ae Siasí kihe kakai tuí, kae iku launoa, pea hangē koe manu koe ‘ositulisi, ‘oku ne vili hono ‘ulú ‘ihe ‘one’oné ‘o toitoi, lolotonga iá ‘oku hinga hono kaungā’apí moe ‘ātakaí ki heli. ‘Oku lava pe ‘ae Siasí ‘o fakafolo’aki ‘ae kakaí ha “faito’o konatapu” kene ongo’i mo’ulaloa ai ‘o talitalia lelei ‘ae faihala moe ngāue hala’aki ‘ehe kau Takí ‘ae mafaí. Kapau na’e lava ‘ae Siasí ‘o fakakakato hono ngafa faka-Palōfita ‘ihe taimi ‘o Marx, na’e pehē ha ‘ikai hoko mai ‘ae mala ‘oe kominiusí moe ta’etui ‘Otuá.

‘Oua na’a tau pusiaki’i ‘ae kau Palōfitá pea ‘oua te tau fakalalata’i ‘ae kōsipelí. ‘Oku fiema’u ‘ehe ‘Eikí ketau ‘uluaki angatonu mo faitotonu. “Kuo ne fakahā kiate koe tangata ‘ae me’a ‘oku leleí, ‘Io koehā ‘ae me’a ‘oku ‘eke ‘e Sihova kiate koe? Ngāue totonu, ‘ofa kihe meesí, pea ke angavaivai ‘ihe ‘ao ‘oe ‘Eikí.” (Maika 6: 8)

‘Oku tau ‘iha taimi ‘oku vave ai ‘ae liliu fakasōsiale ‘i Tongá pea moe lahi ‘ae ‘ilo fakapolitikalé kae pehē kihe ngaahi fakafehufehu’i ‘oku ‘aongá. ‘Oku totonu ketau kau kiai ‘ihe loto tokanga moe lotu ma’ae Siasí, kau Takí moe Falealeá he ‘oku mei kamata.

  ‘Oku tau lotu ma’a hotau kau Takí kenau angatonu mo faitotonu pea kenau ongo’i foki honau kakaí. Tau lotu foki ma’ae Siasí kene kei tui pīkitai kihe ‘Eikí ‘i hono ngafa faka-Palōfita kihe kakai ‘oku ngāue kiaí.

(mei he Kele'a)